Vetingu, avokat Visha: Subjektet politike nuk mund të marrin iniciativë pa folur me ekspertët

Për juristin Saimir Visha çdo ndërhyrje e ndërkombëtarëve për ndryshimin e Kushtetutës është e gabuar.

Ai tha se nëse do të kërkohet të zgjatet afati i Komisionit të Pavarur i Kualifikimit, atëherë do të thotë se nuk kemi besim tek Këshilli i Lartë i Prokurorisë dhe Këshilli i Lartë Gjyqësor.

“Nëse do të heshtim do të heshtim përballë një argumenti se duhet një ndryshim kushtetuese dhe çdo 2-3 vjet që nuk ka ndodhur asnjëherë në një vend të BE, jemi vetmi vend që ndërhyjmë kaq shpesh. Ne duhet të dëgjojmë ekspertët, përse ata arritën në këtë pikë ku nuk përmbushën vetingun për 700 subjekteve. Cila është arsye sepse i patën të gjitha mundësitë për 5 vjet e gjysmë. Parlamenti kërkon zgjatje me 2 vjet e gjysmë. Po nëse sërish nuk i përmbushin?”, tha avokati Visha.

Ai theksoi se partitë politike nuk duhet të marrin iniciativa pa dëgjuar ekspertët. Visha foli për interesa monetare duke iu referuar në mënyrë specifike Misionit Ndërkombëtar të Monitorimit.

Sipas avokatit nëse kjo “barrë” nuk merret nga Këshilli i Lartë i Prokurorisë dhe Këshilli i Lartë Gjyqësor do të thotë se reforma në drejtësi nuk ka sjellë besim.

“Në 31 vite, Kushtetuta mund të jetë prekur 50 herë”, u shpreh avokati duke shtuar se nuk duhet pranuar një ndërhyrje emocionale apo nevoja për “Pazar” duke marrë reformën në drejtësisë dhe dhënë reformën territoriale.