Zgjedhjet 2021, Aleksandër Çipa: Dy entitete nuk morën pjesë

Analisti i njohur, Aleksandër Çipa deklaroi në studion e Euronews se pjesëmarrja e votuesve si përqindje ishte më e lartë në raportin me 2017-ën. Mirëpo ai theksoi se zgjedhjet e këtij viti, ka dy entitete që nuk morën pjesë, pikërishti emigracioni dhe diaspora.

“Në 2017-ën ekzistonte e gjithë mundësia që partitë të vinin në funksion autobuzat e emigrantëve dhe erdhën, ndërsa tani u përjashtuan. Në pikëpamjen e qytetarëve rezidencialë, kjo është pjesëmarrja më e madhe që mund të kemi pasur në një proces zgjedhor të viteve të fundit.’’, tha z.Çipa.

Ai preku gjithashtu qarkun e Vlorës ku është kuota më e ulët e pjesëmarrjes dhe theksoi se është qarku që ka numrin më të madh të votuesve emigrantë. Sipas tij, në Vlorë ishte pjesëmarrja më e ulët e votuesit femër.

Z.Çipa komentoi gjithashtu daljet e liderëve kryesorë të dy partive, për të cilët deklaroi se kishin një normë maturiteti në artikulimin e tyre dhe sipas tij kryeministri apeloi që të presim institucionin të certifikojë rezultatin.

Ai u shpreh se ky është turi zgjedhor me rivalitetin më të lartë në harkun kohor të dhjetë viteve të fundit.