Kryekomisioneri Shtetëror për Zgjedhjet, Ilirjan Celibashi thotë se mund të ketë votim elektronik edhe në dy bashki të tjera, përveç asaj të Vorës, në lidhje me zgjedhjet e 14 majit.

Në një deklaratë për mediat, Celibashi u shpreh se KQZ-ja i ka bërë kërkesë qeverisë për financim të projektit të votimit elektronik për 6 bashki.

Por për shkak të kohës në dispozicion, votimi elektronik mund të realizohet në dy bashki.

“Jemi akoma në një proces diskutimesh me qeverinë. Ne kemi bërë kërkesën për financim të projektit të votimit elektronik edhe për 6 bashki të tjera. Koha që kemi në dispozicion, në fakt na e bën të pamundur zhvillimin në këto 6 bashki, sepse jemi shumë vonë. Ndoshta për një ose dy bashki më shumë se sa Vora, ne mundet ta realizojmë votimin elektronik, por gjithsesi, mbetet për t’u parë nëse këtë javë ose javës tjetër, do të marrim një përgjigje të qartë nga qeveria nëse i disponon paratë për ta financuar këtë projekt.

Do preferonim që të kishim një bashki të madhe, apo dy bashki të mëdha dhe ndoshta një bashki relativisht mesatare le të themi. Në total, 400 qendra votimi, maksimumi, do të ishte e përshtatshme për ta zhvilluar për kohën që kemi në dispozicion, votimin elektronik”, theksoi ai.