Zgjedhjet e jashtëzakonshme në Kosovë, pjesëmarrja kaloi 14% deri në orën 13:00. Procesi i votimit vijon

Në fshatin Gorazhdec të Komunës së Pejës është vërejtur flamuri i Serbisë në Qendrën e Votimit, e cila është larguar menjëherë nga Komisioni Qendror i Zgjedhjeve.

Zëdhënësi i Policisë nga rajoni i Pejës, Fadil Gashi tha se pasi që është njoftuar Policia e Kosovës, ka raportuar KQZ-në dhe flamuri është larguar nga komisioneri i Qendrës së Votimit.

Ai tha se pas largimit të flamurit nuk ka pasur ndonjë incident dhe deri më tani situata është e qetë.

“Policia është njoftuar, e ka raportuar, ka vërejtur vetëm flamuri i Serbisë. Policia është për siguri nuk është me heq flamuj, KQZ e ka hequr. E ka vërejtur që veç flamuri i Serbisë është në vendvotimin e Gorazhdecit. Menjëherë kemi raportuar në KQZ dhe e ka larguar komisioneri. Qetë është gjithçka”, tha Gashi.

Pasardhësit e dy prej ish-krerëve të Ushtrisë Çlirimtare të Kosovës që po gjykohen në Hagë, Endrit Thaçi dhe Klestor Veseli sot kanë shfrytëzuar të drejtën e votës.

Që të dy votuan paraditen e së dielës në qendrën e votimit, saktësisht në shkollën “Faik Konica”, në Prishtinë.

Klestor Veseli, i shoqëruar nga nëna dhe vëllau, nuk pranoi të prononcohet për media. I shoqëruar nga nëna e tij ishte edhe Endriti, djali i Hashim Thaçit.

Ai për KosovaPress, tha se presin një ndryshim që duhet të ndodh.

“Presim një ndryshim i cili duhet të ndodh”, tha Thaçi. Sot në vend po mbahen zgjedhjet e parakohshme, ku qytetarët votojnë për të zgjedhur legjislaturën e re.

Ndërkohë, kujtojmë që gjykimi në Hagë ndaj ish-krerëve të UÇK-së është ende duke vazhduar.

Kandidati për kryeministër nga radhët e Lidhjes Demokratike të Kosovës, Lumir Abdixhiku, ka votuar këtë të diel në zgjedhjet parlamentare, i shoqëruar nga bashkëshortja e tij, në shkollën “Faik Konica” në Prishtinë.

Pas votimit, Abdixhiku u bëri thirrje qytetarëve që të dalin masivisht në zgjedhje dhe të ushtrojnë të drejtën e tyre të votës.

Ai theksoi se zgjedhjet janë një moment i rëndësishëm për demokracinë dhe të ardhmen e vendit, duke i cilësuar si “festë të demokracisë dhe shprehjes së lirë të vullnetit të qytetarëve të Kosovës”.

“Zgjedhjet janë festë për popullin tonë. Janë festë e demokracisë, shprehjes së lirë të vullnetit të popullit të Kosovës. Siç kemi dëshmuar tash e sa kohë dhe tash shpesh kohët e fundit, Kosova organizon zgjedhje të mira, të mbara dhe demokratike. Sot presim këtë ditë të mirë të kemi zgjedhje të mira dhe demokratike”, deklaroi ai.

Ai shtoi se brenda ditës së votimit vendoset fati i qeverisjes për katër vitet e ardhshme.

“Sot është një ditë ku brenda 12 orëve vendoset fati i republikës për katër vitet e ardhshme. Në këtë drejtim pres pjesëmarrje masive të qytetarëve të Kosovës”, u shpreh Abdixhiku.

Vjosa Osmani, kandidate për presidente nga radhët e Lidhjes Demokratike të Kosovës (LDK), sapo ka hedhur votën e saj.

Osmani para mediave ka thënë se ka optimizëm që zgjedhjet e sotme do ta shtrojnë rrugën drejt formimit të institucioneve dhe daljes së vendit nga kriza.

“Jam e bindur që me votën e qytetarëve sot do të mundësohet rruga drejt formimit të institucioneve dhe daljes nga kriza. Kam optimizëm të madh që sot vota e qytetarëve do ta nxjerrë vendin nga kriza”, tha Osmani.

Këtë të dielën po mbahen zgjedhjet e parakohshme parlamentare në Kosovë, ku qytetarët po ushtrojnë të drejtën e tyre të votës në të gjithë vendin.

Në qendrën e votimit “Sveti Sava” në Mitrovicën e Veriut është raportuar një rast i veçantë gjatë procesit zgjedhor, ku një votuese me origjinë serbe ka ushtruar të drejtën e saj të votës e veshur me vello.

Ngjarja është vënë re gjatë votimit në këtë qendër, ndërsa procesi zgjedhor po zhvillohet normalisht.

Ndërkohë, sipas Komisionit Qendror të Zgjedhjeve, të drejtën e votës e kanë 2.092.174 qytetarë. Votimi organizohet në 949 qendra votimi me 2.550 vendvotime në të gjithë Kosovën. KQZ ka bërë të ditur se këto janë zgjedhjet e 11-ta në nivel nacional që nga përfundimi i luftës.

Në garë marrin pjesë 22 parti politike dhe tre koalicione parazgjedhore. Vetëvendosje garon në koalicion me Guxo, Alternativën dhe Partinë Shqiptare Demokristiane, ndërsa PDK-ja, LDK-ja dhe AAK-ja konkurrojnë të vetme. Pjesë e kësaj gare është edhe ish-presidentja e vendit, Vjosa Osmani, e cila i prin listës për deputetë të LDK-së, partisë ku ishte pjesë përpara mandatit presidencial.

E vetme garon edhe Lista Serbe, partia më e madhe e serbëve të Kosovës, e cila mbështetet nga Beogradi zyrtar.

Një ditë më parë ka votuar diaspora në përfaqësitë diplomatike të Kosovës. Sipas të dhënave zyrtare, nga 27.724 votues të regjistruar jashtë vendit kanë votuar 22.414 qytetarë, ose 80.85% e tyre. Procesi është zhvilluar në 30 përfaqësi diplomatike, përfshirë ambasada dhe konsullata në Evropë, SHBA dhe Kanada.

Kreu i Komisionit Qendror të Zgjedhjeve, Kreshnik Radoniqi, ka qenë i pari që ka hedhur votën në kutitë e zgjedhjeve ditën e sotme.

Ai votoi në shkollën fillore “Lidhja e Prizrenit” në Pejë dhe pas votimit ai u bëri thirrje qytetarëve të Kosovës që të dalin dhe të shfrytëzojnë të drejtën e tyre kushtetuese për të votuar.

“Sot fillon dita e zgjedhjeve dhe për këtë ditë KQZ ka qenë e angazhuar që nga shpallja e saj për përgatitjet. Të gjitha përgatitjet deri më sot pothuajse kanë përfunduar, tash fillon procesi zgjedhor dhe më pas fillon numërimi në të gjitha qendrat komunale të numërimit. I bëj thirrje të gjithë qytetarëve të Republikës së Kosovës që të dalin dhe të shfrytëzojnë të drejtën e tyre kushtetuese për të votuar, me zgjedhjen e tyre do të zgjedhin përfaqësuesit për Kuvendin e Republikës së Kosovës”, ka deklaruar Radoniqi.