Kryeministri britanik, Rishi Sunak, shpalli 4 korrikun si datë për mbajtjen e zgjedhjeve të përgjithshme.
Pas 14 vjetësh në pushtet, konservatorët e Sunakut gjerësisht pritet të humbin zgjedhjet ndaj Partisë Laburiste në opozitë.
Duke i dhënë fund spekulimeve disamujore, Sunak përmes një deklarate jashtë zyrës së tij njoftoi se ai po kërkon mbajtjen e zgjedhjeve të reja më herët seç pritej.
Kjo strategji e Sunakut duket e rrezikshme, duke marrë parasysh faktin se partia e tij, sipas sondazheve, nuk është e para.
“Tani është momenti që Britania të zgjedhë fatin e saj”, tha ai, duke listuar ato që ai tha se i konsideron arritjet më të mëdha gjatë kohës së tij në qeverisje, përfshirë edhe një skemë që ai paraqiti për të ndihmuar bizneset gjatë pandemisë COVID-19.
“Ne do t’i mbajmë zgjedhjet e përgjithshme më 4 korrik”, theksoi ai.
Sunak do të shkojë në zgjedhje jo vetëm prapa laburistëve, por sondazhet sugjerojnë se ai është izoluar disi nga partia e tij dhe gjithnjë e më shumë po varet nga një grup i vogël këshilltarësh, që pritet ta ndihmojnë në fushatën zgjedhore.
Megjithatë, me disa fitore në ekonomi, sikurse inflacioni në rënie, por edhe me rritjen ekonomie, Sunak duket se e ka parë këtë moment si më të mirin për të çuar vendin në zgjedhje.
Sunak mori udhëheqjen e Qeverisë britanike më pak se dy vjet më parë.
Dy partitë veçse kanë nisur fushatën zgjedhore. Sunak dhe Qeveria e tij i akuzojnë laburistët se do të rrisin taksat nëse marrin drejtimin e ekzekutivit. Ndërkaq, laburistët akuzojnë Qeverinë e konservatorëve për 14 vjet keqmenaxhim ekonomik.
LEXONI GJITHASHTU:
