Zgjedhjet në PD/ Deputetët që mbështesin Bardhin: Basha po kryen një akt përçarës

Pas deklaratës së mbështetësve të Lulzim Bashës në PD se ditën e nesërme më 29 korrik do të mbahen zgjedhjet për kryetarin e ri, një pjesë e grupit parlamentar të PD të cilët mbështesin sekretarin e përgjithshëm Gazment Bardhi kanë reaguar me anë të një deklarate.

Ata thonë se Lulzim Basha dhe mbështetësit e tij po kryejnë një akt përçarës të panevojshëm për partinë në këto momente, duke mos respektuar vendimin e Këshillit Kombëtar për anulimin e datës së zgjedhjeve për kryetarin e ri.

Në deklaratën e tyre thuhet gjithashtu se grupi parlamentar i PD-së apelon për maturi, për ofrimin e zgjidhjeve forcimin e partisë dhe jo shndërrimin e saj një parti familjare.

“Grupi Parlamentar i Partisë Demokratike apelon për maturi, për ofrimin e zgjidhjeve dhe jo thellimin e përçarjes; forcimin e partisë dhe jo shndërrimin e saj një parti familjare; respektimin e vendimit të Këshillit Kombëtar të Partisë Demokratike dhe jo rrugë antistatutore që kanë treguar që nuk të çojnë askund përveçse mbajnë nën konflikt permanent PD dhe forcojnë Edi Ramën.

Dje Këshilli Kombëtar i PD, organi më i lart vendimmarrës në PD, ka vendosur anulimin e datës 29 Korrik për zgjedhjet e kryetarit të PD. Ky vendim është i detyrueshëm për çdo anëtar të PD dhe për çdo funksionar të saj.

Por nesër Lulzim Basha ka lajmëruar një akt përçarës të Partisë Demokratike. Interesi i demokratëve është lufta e të gjithëve bashkë, kundër Edi Ramës. Interesi i Lulzim Bashës po duket që është përçarja, zvogëlimi, lufta dhe armiqësia mes demokratëve dhe ndërtimi i një partie personale, që i shërben vetëm interesit të tij personal.

Në vijim të ndërtimit të një partie personale, nesër sipas tij do të zgjidhet Kryetari i Partisë. Qartësisht ajo që po bën Lulzim Basha nuk ka lidhje me Partinë Demokratike. Këshilli Kombëtar i PD në detyrë, funksional, i regjistruar në gjykatë dhe me mandat që i përfundon më 17 Korrik 2025, ka vendosur me vendimin e datës 27 Korrik 2023 anulimin e zgjedhjeve.

Proceset antistatutore, nuk janë asgjë tjetër, vetëm një akt turpi për të dëmtuar PD, për të mbajtur gjallë ndasitë mes demokratëve dhe për të shfokusuar PD nga beteja me regjimin e Edi Ramës”,-thueht në deklaratën e deputetëve demokrat mbështetës së Gazment Bardhit.

LEXONI GJITHASHTU:

• “Maratona Enkelana” në Pogradec, mbi 700 pjesëmarrës. Akset që do bllokohen
• Tragjedi në Kosovë, gjenden të vdekur tre anëtarë të një familje, çfarë dyshohet