Zgjerohen protestat e fermerëve, manifestime në Gjermani, Zvicër dhe Greqi kundër…

Fermerët në shumë vende evropiane po frymëzohen nga shembujt e homologëve të tyre dhe zinxhiri i protestave është përhapur në të gjithë BE-në.

Në Gjermani, rreth 2 mijë traktorë do të bllokonin aksesin për tek aeroporti i Frankfurtit, por sipas policisë, në fund mbërritën vetëm 400. Një nga problemet e prodhuesve gjermanë është skadimi i rimbursimit të taksave për naftën.

Në qytetin zviceran të Gjenevës, mbi 30 fermerë i çuan traktorët e tyre në qendër për të kërkuar paga më të drejta. Shqetësimi kryesor i tyre ishte pakënaqësia me fitimet madhore dhe jotransparente të supermarketeve të mëdha, që mashtrojnë me kostot e produkteve, duke i shitur më shtrenjtë.

Në Selanik të Greqisë, fermerë të zemëruar hodhën në tokë produktet e tyre duke thënë se është njësoj si t’i shesësh pa përfituar asgjë. Qytetarë nga rajone të ndryshme të Greqisë dolën në rrugë me arkivole dhe flamuj të zinj, për të treguar se rritja e kostos i ka çuar në prag të falimentit.

LEXONI GJITHASHTU:

• Protesta e fermerëve, Meta nga Korça: Ballkani i Hapur shkatërroi prodhimin vendas
• Marshojnë drejt Parisit| Protestat e fermerëve, bllokojnë autostradat në Francë