Zhduket nëna e prezantueses amerikane Savannah Guthrie, çfarë dyshon policia

Nancy Guthrie, nëna e prezantueses së emisionit “Today” në NBC, Savannah Guthrie, është raportuar e zhdukur nga banesa e saj në shtetin e Arizonës, bëjnë me dije autoritetet lokale.

Nancy Guthrie, 84 vjeçe, është parë për herë të fundit të shtunën në mbrëmje, rreth orës 21:30, pranë shtëpisë së saj në zonën Catalina Foothills, afër qytetit Tucson. Sipas Sherifit të Qarkut Pima, Chris Nanos, një anëtar i familjes ka telefonuar numrin e emergjencës 911 rreth mesditës së së dielës për të raportuar zhdukjen.

Autoritetet bëjnë me dije se ajo vuan nga disa probleme fizike, por familja ka deklaruar se nuk ka pasur shqetësime njohëse. Megjithatë, sipas sherifit, rrethanat e gjetura në banesë kanë ngritur shqetësime, pa u dhënë detaje të mëtejshme.

Ekipet e kërkim-shpëtimit, përfshirë vullnetarë, qen gjurmimi, agjentë të patrullës kufitare dhe helikopterë, janë angazhuar në kërkime intensive gjatë natës. “Kemi bërë pothuajse gjithçka që është e mundur në këtë fazë,” u shpreh Nanos.

Detektivë nga njësia e vrasjeve janë përfshirë në hetime dhe nuk është përjashtuar mundësia e një vepre penale. Autoritetet konfirmojnë se rasti po trajtohet si zhdukje personi dhe familja po bashkëpunon ngushtë me forcat e rendit.

Një zëdhënës i NBC News deklaroi se familja Guthrie është mirënjohëse për mbështetjen, mendimet dhe lutjet e publikut.