Zhdukja e Ervis Martinajt, merren në pyetje kushërinjtë Avdylaj

Astrit dhe Jasin Avdylaj, që ndodhen në masën e “arrestit të shtëpisë” për një nga fraksionet e dosjen “339” (laboratorin e Hasit), janë marrë në pyetje në lidhje me zhdukjen e Ervis Martinajt.

Marrja në pyetje është bërë me kërkesë të Prokurorisë së Kurbinit nga Policia e Lezhës, ndërsa agjentët kanë mbërritur në Durrës, ku edhe banojnë.

Në kuadër të kësaj kërkese është bërë edhe kontroll banese, ku nuk është konstatuar asnjë send i kundraligjshëm.

Martinaj dyshohet të ketë pasur një nga takimet e fundit para se të humbiste çdo gjurmë me kushërinjtë Avdylaj, ndërsa organi i akuzës dyshon se këta të fundit mund të kenë pasur dijeni mbi lëvizjet e tij.

Ervis Martinaj, i njohur si ‘mbreti’ i lojërave të fatit, është zhdukur prej më shumë se 2 muajsh.

Zhdukja e tij ka vënë në lëvizje jo vetëm institucionet e drejtësisë, por edhe politikën.

Kryeministri Edi Rama ka deklaruar se shumë shpejt do të kemi një përgjigje për fatin e tij.

Ndërsa kreu i Partisë Demokratike, Sali Berisha, tha para gazetarëve se Rama e di ku ndodhet ‘mbreti’ i lojërave të fatit’ dhe akuzoi Prokurorinë se nuk po vepron.

LEXONI GJITHASHTU:

• Furnizonin me informacione klanin Duka për Ervis Martinajn, gjykata dënon 3 persona
• Inskenim apo rrëmbim? Misteri për fatin e Ervis Martinajt
• Rama: Policia nuk i ka provat e nevojshme për Ervis Martinajn