Zjarr i madh në Tbilisi, digjet një pjesë e tregut të stacionit hekurudhor

Një zjarr i përmasave të mëdha ka përfshirë mëngjesin e 30 prillit tregun pranë “Stacionit Hekurudhor Borjomi”, në afërsi të stacionit të metrosë “Vokzalnaya Ploshchad” në Tbilisi. Sipas raportimeve të “Ekho Kavkaza”, zjarri shpërtheu në depot që përmbanin rroba, fruta, perime dhe mallra të tjera, duke përfshirë një sipërfaqe prej rreth 15,000 metrash katrorë.

Shërbimi i Situatave të Emergjencave njoftoi se burimi i zjarrit është lokalizuar dhe aktualisht po punohet për shuarjen e plotë të flakëve. Nuk raportohet për viktima deri më tani, por dëmet materiale janë të konsiderueshme.

Për shkak të afërsisë me vendin e ngjarjes, Klinika “Todua” ka nisur evakuimin e pacientëve të saj. Ata po transferohen në ambiente të tjera mjekësore me ndihmën e ambulancave.

Një nga tregtarët që ndodhej në zonë, tha për mediat: “Gjithçka u dogj, nuk mbeti asgjë. Ishte një makth – kishte tym kudo. Një pjesë e rrobave të përdorura u dogj gjithashtu. Gjithçka u ndez menjëherë.”

Shkaqet e zjarrit mbeten të paqarta dhe autoritetet kanë nisur një hetim për të zbardhur rrethanat e ngjarjes.

Autoritetet lokale i bëjnë thirrje qytetarëve të shmangin zonën deri në përfundimin e operacioneve të emergjencës.

LEXONI GJITHASHTU:

• Si rekrutoi inteligjenca ruse të burgosur për luftën në Ukrainë
• Dalin pamjet e autorit të dyshuar të vrasjes së 58-vjeçarit në Vlorë