Zyrat e shpërndarjeve të kartave të identitetit do të jenë të hapura edhe të shtunën

Ministria e Brendshme bën me dije se zyrat e shpërndarjes së kartave të identitetit do të jenë të hapura edhe ditën e shtunë, më 10 maj 2025.

Vendimi është marrë nga shoqëria “IdentiTek”, me qëllim lehtësimin e qytetarëve që nuk kanë mundur të tërheqin dokumentet brenda orareve zyrtare gjatë ditëve të javës.

Zyrat do të jenë të hapura nga ora 09:00 deri në 14:00, vetëm për procesin e tërheqjes së kartave të identitetit.

Sipas autoriteteve, është vërejtur një rritje e ndjeshme e aplikimeve nga qytetarët, të cilëve u kanë skaduar dokumentet e identitetit, sidomos në prag të zgjedhjeve të përgjithshme.

Qeveria ka miratuar gjithashtu aktet normative që u lejojnë shtetasve të votojnë edhe nëse zotërojnë një dokument biometrik me afat të skaduar, për të garantuar që çdo qytetar të mund të ushtrojë të drejtën e votës pa pengesa.

LEXO GJITHASHTU:

• Koha e pajisjes me kartat e identitetit ulet në vetëm 3 ditë, sa kushton procedura
• Shtyhet afati i vlefshmërisë për dokumentet e identitetit që skadojnë deri më 11 maj