Zyrtari ukrainas: Rusia po përgatitet për “përshkallëzimin maksimal” të luftës

Rusia po përgatitet për një “përshkallëzim maksimal” të luftës në Ukrainë, potencialisht në javët e ardhshme, sipas një zyrtari të lartë të sigurisë kombëtare të Ukrainës.

“Këta do të jenë muaj përcaktues në luftë. Rusia po përgatitet për përshkallëzim maksimal. Është duke mbledhur gjithçka që është e mundur, duke bërë stërvitje. Kur bëhet fjalë për një ofensivë nga drejtime të ndryshme, për momentin mund të them se nuk po përjashtojmë asnjë skenar në dy-tre javët e ardhshme”- tha Oleksiy Danilov, Sekretari i Këshillit të Sigurisë Kombëtare dhe Mbrojtjes së Ukrainës, në një intervistë për mediat e huaja.

Zyrtarët ukrainas kanë paralajmëruar për disa kohë për një ofensivë ruse dhe kanë kërkuar armë më të fuqishme nga aleatët perëndimorë për të kundërshtuar kërcënimin.

Ndërkohë, Ministria e Mbrojtjes e Bjellorusisë tha të martën se do të zhvillojë një javë tjetër stërvitje të përbashkëta ushtarake me Rusinë.

LEXONI GJITHASHTU: 

• SHBA: Rusia po shkel traktatin e kontrollit të armëve bërthamore
• Australia sanksionon iranianët për furnizimin me dronë në Rusi