​Pajtoi shumë gjaqe në Kosovë, nderohet vepra dhe kontributi i Anton Çetës

Për nder të 31-vjetorit të Lëvizjes së Pajtimit të Gjaqeve në Kosovë, në qendër të qytetit të Klinës është vendosur busti i atdhetarit, pajtimtarit dhe profesorit Anton Çeta

Në këtë organizim morën pjesë drejtues të Komunës së Klinës, përfaqësues të institucioneve qendrore e lokale, përfaqësues nga Organizata e Veteranëve të Luftës së Ushtrisë Çlirimtare të Kosovës, klerikë fetarë, personalitete të kulturës, politikës dhe qytetarë.

Kryetari i komunës së Klinës, Zenun Elezaj, theksoi se Anton Çeta e atdhetarët e tjerë filluan misionin jetësor, pajtimin e shqiptarëve, duke shtruar rrugën e bashkimit të shqiptarëve kundër armikut shekullor dhe lirisë e pavarësisë së Republikës së Kosovës.

“31 vite më parë, me nismën e profesorit, shkrimtarit e njeriut të urtë, Anton Çetës, kishte filluar në gjithë Kosovën një aksion fisnik, humanitar e kombëtar për pajtimin e gjaqeve e ndaljen e vëllavrasjes. Në këtë kohë, kur pushtuesi serb kishte filluar marrjen e masave represive, atdhetarët shqiptarë filluan ngritjen e vetëdijes kombëtare”, tha ai, raporton Kosova Press.

Ne emër të Rinisë së Këshillit të Pajtimit të Gjaqeve, Have Shala, tha se profesor Anton Çeta dhe pajtimi i gjaqeve kanë emërues të përbashkët paqen.