​Teknologjia VAR mbërrin në Kosovë, nisin testimet

Edicioni i ri i Superligës së Kosovës në futboll do të ndihmohet edhe përmes sistemit teknologjik VAR (Video assistant referee).

Faqja zyrtare e Federatës së Futbollit të Kosovës publikoi një video të shkurtër për ardhjen e kësaj teknologjie.

Sekretari i FFK-së Eroll Salihu i tha KosovaPress se ka arritur një pjesë e teknologjisë së VAR-it, ndërsa menjëherë kanë nisur testimet në kampin stërvitor në Hajvali.

“Po, tashmë i kemi tri makina me teknologjinë VAR këtu në Prishtinë dhe jemi duke e testuar atë në disa ndeshje provuese.”, ka thënë Salihu.

Pavarësisht kritikave, sistemi VAR ka dëshmuar se mbetet një alternativë e duhur për të gjykuar rastet e dyshimta, që shpeshherë nuk kanë munguar në përballjet sportive.