100 tonelata peshk i ngordhur, Volos shpall gjendjen e jashtëzakonshme

Mbi 100 tonelata peshk i ngordhur kanë dalë në sipërfaqen e ujërave të Volosit. Peshqit e ngordhur kanë mbushur si gjirin, ashtu edhe lumenjtë që ndodhen aty pranë pasi ishin zhvendosur nga habitatet e tyre si pasojë e përmbytjeve të vitit të kaluar.

Anijet e peshkimit janë marrë nën kontroll nga autoritetet rajonale, të cilat po përdorin mjete të ndryshme për të nxjerrë peshqit nga deti, për t’i ngarkuar në kamionë dhe për t’i çuar në incenerator.

“Po bashkëpunojmë me të gjithë ata që duan të ndihmojnë për t’i dhënë fund kësaj tragjedie. Qeveria rajonale ka shpallur gjendjen e emergjencës”, tha Anna Maria Papadimitriou, zëvendës guvernatore e rajonit të Thesalisë

Nivelet e ujit u rritën papritur vjeshtën e kaluar gjatë një stuhie fatale që shkaktoi përmbytje të mëdha në Greqinë qendrore, por që së fundmi ato janë ulur si pasojë e mungesës së shiut këtë verë.

Ekspertët thonë se autoritetet nuk kishin vendosur një rrjetë në grykën e lumit që të çon në Volos, ndaj dhe kur peshqit e ujit të ëmbël u rrëmbyen nga përmbytjet ngordhën kur ranë në kontakt me ujin e kripur.

Kryebashkiaku i Volosit akuzoi autoritetet rajonale se kishin vepruar me ngadalë pasi ngordhja e peshqve mund të shkaktojë një katastrofë mjedisore.

Ndërsa Dhoma e Tregtisë deklaroi se do të ndërmerrte një aksion ligjor për të kërkuar dëmshpërblim, pasi aktivitetet tregtare në destinacionin turistik ranë me rreth 80% në tre ditët e fundit.

LEXONI GJITHASHTU:

• VIDEO| Skena apokaliptike në Volos, mijëra peshq të ngordhur pluskojnë në breg
• Avancimi i forcave ruse, Ukraina shkarkon komandantin ushtarak në Kharkiv