1080 kërkesa për panele diellore, do pranohen 2000 aplikime

Gjysma e paneleve diellore që do të jepen me cmim të lirë për qytetarët, tashmë janë prenotuar. Interesi për të përftuar ngrohje uji pa harxhuar energji duket të jetë i lartë, ku vetëm në 8 ditë numërohen mbi 1000 aplikime.

Prej datës 1 nëntor, 2000 familjeve u garantohet në banesën e tyre një panel diellor me çmim të lirë.

 Për të fituar këtë impiant, ata aplikojnë në faqen eficenca.al me disa dokumente, si certifikata, libreza e energjisë elektrike, hipoteka etj. Interesi duket të jetë i lartë për të marrë këto panele me 30% të vlerës, pasi për 8 ditë kanë shprehur interes 1080 familje.

Sipas thirrjes që bën qeveria, panelet diellore do të përdoren vetëm për ngrohjen e ujit, si një mundësi alternative për kursim energjie.

Pas kërkesës, cdo banesë apo familje që plotëson kushte do të marrë të instaluar panelin, i cili kushton rreth 140 mijë lekë. Për këtë sistem, qytetari do të paguajë 42 mijë lekë ndërsa pjesa tjetër paguhet nga qeveria për njërën nga 7 kompanitë e licencuara për shërbimin.

Nuk ka një afat të fundit për aplikimet, por ato do të përmbyllen kur të përmbushen 2000 kërkesa.

LEXONI GJITHASHTU:

• Panele diellore për familjet, 2000 banesa do përfitojnë ngrohje uji me çmim të lirë
• Panelet e vogla diellore në Francë po ulin faturat e energjisë për qytetarët