KQZ pranoi kërkesën e PD për publikimin e rezultateve të Vorës nesër, reagon PS

Partia Socialiste ka reaguar ashpër pas vendimit të Komisionit Qendror të Zgjedhjeve për të mosnxjerrjen e rezultateve të Vorës dhe Njësisë 10, duke e cilësuar këtë veprim si “arbitrar” dhe të padrejtë.

Sipas PS-së, ky vendim bie ndesh me logjikën e votimit elektronik, traditën e shpalljes së menjëhershme të rezultateve, si dhe me investimin e konsiderueshëm që është bërë për infrastrukturën elektronike.

Në një deklaratë të shpërndarë për mediat, Partia Socialiste thekson se ky është një vendim i gabuar dhe zhgënjyes, që dëmton rolin e KQZ si garant i sovranitetit popullor, e jo si instrument për të shërbyer interesave taktike të partive politike.

“Mosnxjerrja e rezultateve të Vorës dhe Njësisë 10 nga KQZ, me një vendim arbitrar që bie ndesh me logjikën e votimit elektronik, me traditën e shpalljes menjëherë të rezultatit, si edhe me vetë arsyen e investimit jo të vogël që është bërë për infrastrukturën elektronike, është një vendim arbitrar, i gabuar dhe zhgënyes për rolin e KQZ si garant i Sovranit popull, e jo i nevojave taktike të partive politike.

Jemi të keqardhur për këtë dhe u bëjmë thirrje Partisë Socialiste të Vorës si edhe mbështësve tanë në Vorë të ruajnë qetësinë.

Rezultati është në kuti dhe mos kini asnjë dyshim se asgjë dhe askush nuk e ndryshon dot atë. Ju jeni dallandyshja e parë e një fitoreje që do të jetë e paharrueshme në historinë e Partisë Socialiste.

Urime, urime, urime!

Të gjithë socialistët e përfshirë në proces në të gjithë Shqipërinë duhet të ruajnë qetësinë, t’u shmangen provokimeve dhe të nxjerrin me durim fitoren nga kutitë ku populli Sovran ka kyçur vendimin e tij historik”, thuhet në deklaratë.

LEXONI GJITHASHTU:

• “Po shkel ligjin”, Balla përplaset ashpër me komisionerët e votës së diasporës
• “190 mijë vota nga diaspora presin të numërohen”, Topalli tregon problemet në Greqi