“15 vjet në Shqipëri + 20…”- Njohja e pensioneve me Italinë, Balla shpjegon skemën

Presidenti i Shoqatës “Diaspora 91-19”, Esat Balla, është shprehur se marrëveshja për njohjen e pensioneve me Italinë duhet të kalojë në Parlamentet e dy vendeve respektive, përpara se të vihet në zbatim.

Komentet Balla i bëri në një lidhje për “Euronews Albania”, ku tha se për marrjen e pensionit në Shqipëri duhen dy kritere, 15 vite punë dhe mosha mbi 65-vjeç.

Ndërsa për marrjen e pensionit në Itali, sipas tij duhen 20 vite punë dhe mosha mbi 67-vjeç.

Ai shpjegoi se një person që ka ikur herët në Itali dhe rezulton të ketë 14 vite punë në Shqipëri  dhe  19 vite në Itali, me skemën e tanishme nuk përfiton pension.

“Është miratimi  në 2 parlamente, në Parlamentin italian dhe atë shqiptar. Kemi ende punë akoma, shishen e shampanjës  nuk e kemi hapur akoma. Pasi të miratohet në 2 dhomat e parlamentit, pastaj do të hartohen procedurat sëbashku.

I gjithë qëllimi i kësaj pune është që asnjëri të mos humbë vitet e punës që ka bërë në Shqipëri. Do i njihen të gjitha kontributet.

Shqipëria ka dy kritere, atë të 15 viteve të punës dhe 65 vjeç, ndërsa Italia ka 20 vite punë dhe 67-vjeç. Ka shqiptarë që kanë ikur herët, kanë bërë 14 vite punë në Shqipëri dhe 19 vite punë në Itali. Ky person deri sot nuk merr pension”, tha Balla.

LEXONI GJITHASHTU:

• “Janë varfëruar”- Meta: Pensionistët, kategoria më e diskriminuar nga Rilindja
• Rishikohen pensionet, hidhet në diskutim me Bankën Botërore skema e re