17 vjetori i Pavarësisë, Kurti: Çmoj punën e krerëve shtetërorë të mëparshëm

Kryeministri Albin Kurti në ceremoninë e parakalimit të FSK-së dhe Policisë së Kosovës foli për historinë e krijimit të shtetit të Kosovës deri në krijimin e tij.

Kurti tha se Kosova është shteti me historinë më të gjatë të përpjekjeve për krijimin e tij. Ai mbi të gjitha çmoi sakrificën e të gjitha atyre që punuan dhe sakrifikuan për Kosovën ndër breza.

Ndër të tjera, kryeministri Kurti ka folur dhe për deputetët apo krerët e atëhershëm të shtetit pas të cilëve qëndrojnë firmat e nënshkruara të tyre në deklaratën e Republikës së Kosovës më 17 shkurt 2008.

“Republika e Kosovës është rezultat i aktit sipëror të brezit më të ri të të zgjedhurve të popullit të saj, emrat e përveçëm të të cilëve lexohen pas firmave të nënshkruara në deklaratën e Republikës së Kosovës më 17 shkurt 2008 nga 109 deputetë të Kuvendit të Republikës, si dhe nga krerët shtetërorë të asaj kohe: Presidenti Fatmir Sejdiu, kryekuvendari Jakup Krasniqi dhe kryeministri Hashim Thaçi”, tha Kurti.

Ai shtoi se Republika e Kosovës është shtëpia e popullit tonë, është shtëpia e shqiptarëve dhe pakicave që jetojnë në vend.

LEXONI GJITHASHTU:

• ​Osmani: Kosova simbol i dinjitetit dhe i një sakrifice të pashembullt për liri
• “Ky moment është lënë nën hije nga padrejtësitë”, Grenell mesazh urimi për Kosovën