Drejtoria e Përgjithshme e Burgjeve ka dalë me një komunikatë për shtyp në lidhje me dronin që mbrëmjen e të enjtes fluturoi mbi territorin e burgut të Peqinit dhe hodhi aty dy pako.

Sipas autoriteteve të burgjeve brenda pakove ndodheshin dy aparate celularë iPhone 11 dhe një iPhone 11 Pro Max, si dhe fisha për karkimin e telefonave.

Gjithashtu bëhet me dije se krahas telefonëve në pako ndodheshin dhe lëndë narkotike të llojit kokainë dhe kanabis.

Ngjarja ndodhi rreth orës 20:37, ku mjeti fluturues u konstatua nga shërbimet e sigurisë në burgje teksa fluturonte në një distancë prej 100 metrash mbi ambientet e burgut.

Në lidhje me rastin, prokuroria ka nisur një hetim për gjetjen e personave brenda burgut dhe jashtë tij të përfshirë në këtë aktivitet të paligjshëm.

Njoftimi i Drejtorisë së Përgjithshme të Burgjeve:

Në datën 12 shtator 2024, rreth orës 20:37, shërbimet e sigurisë në Institucionin e Ekzekutimit të Vendimeve Penale (IEVP) Peqin konstatuar një mjet fluturues, dron, që fluturoi në një lartësi prej 100-150 metrash në territorin e burgut, ku për 1 minutë e 20 sekonda hodhi dy pako brenda ambienteve të burgut.

Pasi u identifikua mjeti fluturues, u njoftuan menjëherë forcat e sigurisë të IEVP Peqin, të cilët, së bashku me Forcat Speciale të Drejtorisë së Përgjithshme të Burgjeve realizuan kontrolle të hollësishme në zonën e hapur dhe të mbyllur të institucionit të rregjimit të IEVP Peqin.

Pas kontrolleve të detajuara, u zbulua se një nga pakot përmbante dy aparate celularë, një iPhone 11 dhe një iPhone 11 Pro Max, si dhe tetë fisha për karikimin e telefonave. Në një tjetër pako u gjetën 380 gramë të dyshuar kanabis sativa, të ndara në doza të vogla nga 0.13-0.15 gramë, si dhe 33 doza të vogla me lëndë të dyshuar si kokainë, me një peshë totale prej 57.7 gramë.

Drejtoria e Përgjithshme e Burgjeve ka ndërmarrë menjëherë një sërë masash për të rritur sigurinë, duke përfshirë: shtimin e forcave të specializuara për monitorimin e hapësirave të jashtme dhe kontrollin e aktiviteteve të dyshimta; kontrollin e plotë të të gjitha zonave të hapura dhe të mbyllura të IEVP-së; si dhe analizimin e ngjarjes për  përfshirjen e të dënuarve apo të paraburgosurve në këtë ngjarje. Po ashtu, është parashikuar që të gjithë të burgosurit ose të paraburgosurit që do të dyshohen për përfshirje në ngjarjen e mësipërme do të transferohen menjëherë në institucione të tjera për të parandaluar ndonjë përfshirje të mëtejshme në aktivitetet e paligjshme.

Policia e Shtetit dhe Prokuroria po hetojnë ngjarjen për të identifikuar personat përgjegjës dhe për të vënë përpara drejtësisë organizatorët e kësaj veprimtarie të paligjshme. Drejtoria e Përgjithshme e Burgjeve garanton se do të vazhdojë të marrë të gjitha masat e nevojshme për të rritur më tej sigurinë në institucionet e vuajtjes së dënimit dhe për të parandaluar aktivitetet kriminale brenda tyre. Të gjitha provat e gjetura kanë shkuar për ekspertim të mëtejshme në laboratorin shkencor.

LEXONI GJITHASHTU:

• Drogë dhe fisha karikimi me dron, çfarë u zbulua në burgun e Peqinit
• VIDEO| Momenti kur droni lëshon dy pako brenda burgu të Peqinit, çfarë u gjet në to