Me flamurin kuqezi, kush janë të rinjtë me gjak shqiptar që ranë për Ukrainën

Dy djem nga radhët e diasporës shqiptare kanë humbur jetën në luftën në Ukrainë. Ata ishin ushtarë në ushtrinë e Ukrainës, të cilët luftuan dhe dhanë jetën në krye të detyrës.

Dermentli Anatoly ishte nga fshati shqiptar i Karakurtit (në rajonin e Odesës). Ai kishte lindur më 3 shtator 1980. U mobilizua në Brigadën e mekanizuar Nr.118 në rajonin e Zaporozhias. Në 15 tetor, humbi jetën, në një mision luftimi.

Haydarzhy Danylo u lind në një familje shqiptare në 26 janar 2002 në fshatin Georgivka (rajoni i Zaporozhias). Ai ishte fëmija i dytë në familjen e tij, cila aktualisht, jeton ende në zonën e okupuar nga trupat ruse. Kur filloi lufta ai ishte në Poloni. Në verën e 2022, ai shkoi vullnetarisht për t’u mobilizuar, por u refuzua (për shkak të moshës). Në vitin 2023 pas ditëlindjes së 21-të ai aplikoi sërish dhe shërbeu vullnetarisht në Forcat e Armatosura të Ukrainës. Ai shërbeu në njësinë ushtarake A290 dhe dha jetën në zonën e luftimeve në fshatin Liman, pranë qytetit Kupiansk, në rajonin e Kharkivit.

Pamjet nga ceremonia mortore që u mbajt në Zaporizhja tregojnë se arkivolet e tyre janë të mbuluar me flamurin e Ukainës dhe flamurin shqiptar.

Ndërkohë, fotot personale të më të riut prej tyre, i cili humbi jetën vetëm 21 vjeç tregojnë se nuk e kishte harruar origjinën teksa në krah mbante një tatuazh me shqiponjën dykrenare.

LEXONI GJITHASHTU:

• Luftonin për Ukrainën, vriten në luftë kundër Rusisë dy djem nga diaspora shqiptare
• Biden: Mbështetja për Izraelin dhe Ukrainën jetike për sigurinë e SHBA