2,2 milionë metra katrorë tokë u janë dhënë investitorëve strategjikë në bregdetin e Kavajës.

Një nga perlat turistike që po u vihet në dispozicion privatëve është plazhi i Kalasë së Turrës.

Komiteti i Investimeve Strategjike më 5 prill ka miratuar projektin për Marina Hills që do të ndërtohet nga FINSEC Development.

Sipërfaqja e projektit është 412 hektarë ku një pjesë e tokës është private dhe një pjesë tjetër shtetërore.

Vlera që kompania ka premtuar se do të investojë në ndërtimin e vilave dhe hotelit është 450 milionë euro. Ndërtimi i tyre do të zgjasë 10 vite.

Kompania fituese zotërohet në 70% të saj nga Finsec LTD, e regjistruar në Zvicër dhe ka për administrator Artan Krajën, ndërsa 30 % e aksioneve të saj zotërohen nga Greg Xhillari.

E njëjta zonë zhvillimore më herët i është dhënë kompanisë Mediterranean Wave për të investuar 50 milionë euro në resorte dhe vila. Kjo përplasje projektesh e ka rrudhur projektin e Marina Hills në vetëm 163 hektarë.

Pavarësisht kësaj, Finsec do të ruajë të njëjtin investim dhe numër të punësuarish, por tashmë projekti është më i vogël.

Finsec është një kompani e cila në maj të vitin 2013 mori me koncesion për 35 vjet ndërtimin e një marine turistike me emrin Porto Albania, në një gji shumë pranë plazhit të Kalasë së Turrës.

Vlera e investimit ishte 35.8 milionë euro dhe do shtrihej në një sipërfaqe prej 17 hektarësh.

Por ende dhe sot pas 9 vitesh projekti nuk ka përfunduar.

LEXONI GJITHASHTU:

• 85 për qind e investitorëve strategjikë, shqiptarë
• 1.3 milionë metra katrorë tokë në bregdet për investitorët strategjikë