21 të vrarë nga protesta e Gjeneratës Z në Nepal, qeveria rikthen mediat sociale

Kryeministri i Nepalit, KP Sharma Oli, dha dorëheqjen sot pasi protestuesit në protestat që shpërthyen për shkak të bllokimit të rrjeteve sociale, i cili u hoq herët këtë mëngjes, i vunë flakën shtëpisë së tij, raporton BBC, duke cituar një deklaratë nga zyra e Kryeministrit.

Në fakt, qeveria nepaleze hoqi ndalimin e aksesit në rrjetet sociale që shkaktoi protesta të dhunshme në të gjithë vendin, në të cilat vdiqën 21 persona dhe u plagosën më shumë se 100 të tjerë , njoftuan zyrtarët. Ndalimi i aksesit në rrjetet sociale u hoq brenda natës dhe aplikacionet u bënë përsëri të disponueshme për përdoruesit në Nepal, raporton Reuters sot.

Forcat e sigurisë përdorën municion luftarak, topa uji dhe gaz lotsjellës gjatë protestave në disa qytete.

Nepali, një vend në Himalaje me 30 milionë banorë, është i njohur për politikën e tij të trazuar dhe ka parë më shumë se një duzinë qeverish që kur u transformua në republikë, pasi monarkia 239-vjeçare u shfuqizua në vitin 2008, pas një lufte civile 10-vjeçare.

Megjithatë, protestat e fundit, të udhëhequra nga 13 deri në 28-vjeçarë të njohur si Gjenerata Z, përfaqësojnë trazirat më të këqija të Nepalit në dekada dhe kërcënojnë të destabilizojnë një qeveri tjetër.

Protestuesit dolën përsëri në rrugët e kryeqytetit të martën, duke sfiduar një shtetrrethim të vendosur në qendër të qytetit dhe pasi qeveria hoqi një ndalim për mediat sociale. Fotot nga agjencia e lajmeve Reuters treguan protestuesit duke djegur një stacion policie dhe mobilie jashtë zyrës së Kongresit Nepalez, partisë më të madhe politike të Nepalit.

Në jug të Katmandusë, në komunën Chandrapur, policia qëlloi në ajër ndërsa protestuesit u mblodhën pavarësisht një shtetrrethimi, tha një zyrtar lokal për CNN. Protestuesit gjithashtu i vunë flakën një makine policie, tha burimi.

LEXONI GJITHASHTU:

• Nepal, 19 të vrarë pas protestave kundër korrupsionit e ndalimit të rrjeteve sociale
• Nepali do të kufizojë lejet për ngjitjen në Everest, kush është kushti i ri