3 mld € kredi në 2023/ Në dhjetor u rrit me 435 mln €, kërkesë e shtuar nga biznesi

Bankat tregtarë dhanë 3 mld euro kredi në vitin 2023, me rritje rreth 15% në raport me vitin 2022. Rritja kryesohet nga ndërmarrjet private, të cilat kërkuan para për investime të reja.

Kredia e re për ekonominë shënoi një vlerë rekord prej më shumë se 45 miliardë lekësh, ose 435 mln euro në dhjetor të vitit 2023.

Të dhënat e Bankës së Shqipërisë tregojnë se vlera e kredisë së re u rrit me 48% krahasuar fundin e vitit 2022, çka tregon se ajo përfaqëson vlerën më të lartë historike të kredisë mujore të dhënë nga sektori bankar.

Edhe për vitin e plotë 2023, kredia e re arriti në vlerë rekord, 3 miliardë euro, me rritje 15% krahasuar me vitin 2022.

Për njohësit e ekonomisë, frenimi i rritjes së normave të interesit vitin e kaluar ka mbështetur një rritje me ritme relativisht të larta të kredisë.

Banka e Shqipërisë e rriti vetëm dy herë normën bazë gjatë vitit 2023 dhe ky tregues ngelet në nivelin 3.25%, ndër më të ulëtit në Europë.

Treguesit bankarë flasin për një fluks kreditimi në monedhën lekë, me rritje 35% dhe rritje më e fortë është shënuar tek ndërmarrjet private e më pas tek individët.

Banka Qendrore thotë se 5% e shumës së përgjithshme të kredisë, nuk shlyhet në kohë.

LEXONI GJITHASHTU: 

• Protesta e opozitës, Policia “blindon” Parlamentin me furgonë dhe makina ujëhedhëse
• Serbët e shpërngulur bllokojnë kalimin në Merdare, kërkojnë të kthehen në Kosovë