3 padi në arbitrazh, kompanitë kërkojnë miliona euro

Temë e emisionit Money në Euronews Albania këtë të shtunë ishin gjyqet e qeverisë shqiptare në Gjykatën e Arbitrazhit.

Qendra ndërkombëtare e zgjidhjes së mosmarrëveshjeve në Uashington ka listuar në databazën e saj 11 çështje, nga të cilat 8 janë të mbyllura dhe 3 të tjera janë në proces gjykimi.

Është Kompania Kurum, paditëse për prishjen e kontratës së terminalit të kontejnerëve në portin e Durrësit; kompania EMS Shiping qe menaxhon pjesen lindore të portit tregtar, e qe gjykon se aktiviteti i saj cenohet nga projekti i prezantuar për transformim, dhe cështja për ndërtimin e një terminali çimentoje nga Xenofon Karagiannis, e ngrire që nga viti 2016.

Nëse pretendimet e investitorëve që janë depozituar në këtë qendër, vlerësohen si të drejta, dhe do të shkojnë në favor të tyre, fatura e dëmit financiar do të rëndohet më tej, me gjasë do të 3 apo 4-fishohet, krahasaur me borxhin e sotëm. Pra, mund të shkojë deri në gjysmë milliardë euro.

Ish-avokatja e Përgjithshme e Shtetit, Ledina Mandia deklaroi për Money: “Duket sikur debati është i fokusuar te një çështje që është çështja Becheti, por nuk është një çështje e izoluar. Çështja me sjellje ndaj investitorëve është në përditshmërinë e saj me sjellje të ndryshme të qeveresjes, kështu që në kushtet kur shteti dështon në prodhimin  e kontratave të mira, në veprimet që janë abuzive dhe jo në përputhje me ligjin; kur shfaqen sjellje agresive të pabazuara në ligj nga drejtues të institucioneve shqiptare, apo performacë jo e duhur, i bie që investitorët të gjejnë zgjidhje duke adresuar çështjet e tyre në forume të ndryshme, gjyqësore apo në forume të arbitrazhit ndërkombatar”.

Ndërkohë që Fatos Lazmi ish-anëtar i Gjykatës së Arbitrazhit në Paris deklaroi: “Do përgatitemi për një sezon të vështirë. Shtetit shqiptar i mbeten dy rrugë. Duhet të bëjë një mbrojtje tepër serioze për të testuar shanset e suksesit, ose të marrë në konsideratë zgjidhjen e mosmarrëveshjes me mirëkuptim, duke ofruar dicka nga vetja dhe duke kushtëzuar palën tjetër të heqë dorë nga shuma e madhe”.

LEXONI GJITHASHTU: 

• Avokati i Shtetit ‘fsheh’ vendimet në arbitrazh
• Letra e Bechetit: Unë kam fituar