300 miliardë $| Moska paralajmëron përgjigje nëse konfiskohen asetet e ngrira ruse

Rusia thotë se mund të ulë nivelin e marrëdhënieve të saj diplomatike me SHBA-në, Britaninë e Madhe dhe vendet e tjera perëndimore, nëse konfiskohen asetet e saj të ngrira.

Sipas mediave të huaja, zëvendësministri i Jashtëm, Sergei Ryabkov, tha se Rusia do të hakmerret nëse planet për të përdorur 300 miliardë dollarë asete të ngrira që nga viti 2022 vihen në veprim.

“Ulja e nivelit të marrëdhënieve diplomatike është një nga opsionet, sigurisht”, tha ai sipas agjencisë shtetërore të lajmeve RIA.

“Shumë përfaqësues të lartë në qeverinë tonë kanë folur tashmë për çështjet e reagimit tonë financiar, ekonomik dhe material ndaj këtij hapi [konfiskimit], të cilin si më parë po i paralajmërojmë kundërshtarët që të mos e ndërmarrin”, tha Ryabkov.

“Tani po studiojmë formën optimale të reagimit, ku kundërmasat përfshijnë veprime kundër aseteve të kundërshtarëve tanë perëndimorë si dhe masa të reagimit diplomatik”, shtoi ai.

Kremlini më parë e quajti gjendjen aktuale të lidhjeve të tij me SHBA si “nën zero”, por asnjë degradim zyrtar i marrëdhënieve nuk ka ndodhur që nga fillimi i luftës në Ukrainë.

LEXONI GJITHASHTU:

• Britania do t’i mbajë asetet ruse të ngrira derisa të kompensohet Ukraina
• Aleati i Putin: Moska do të konfiskojë asetet e BE nëse Brukseli i vjedh fondet ruse