4 vite pas përmbytjeve, qindra familje në Porto Romano pa dëmshpërblim

Qindra familje në Porto Romano vazhdojnë prej vitesh kalvarin e gjatë të korrespondencës institucionale për të përfituar paratë që u takojnë.

Prej më shumë se 4 vjetësh ata kërkojnë të marrin dëmshpërblimin që u takon për shtëpitë e përmbytura në prill të vitit 2018.

“Nuk kemi fonde për t’ju dëmshpërblyer thonë dhe ne kemi mbetur në pritje. Hë këtë vit, hë vitin tjetër e si përfundim nuk kemi marrë asnjë lekë,” – u shpreh Ramiz Elezi, një banor i zonës.

“Prej 4 vitesh ne kërkojmë dëmshpërblim. Kemi trokitur nëpër të gjitha dyert e administratës dhe nuk na kanë kthyer asnjë përgjigje,” – tha Sadik Prethi, një tjetër banor.

Dëmi i shkaktuar, sipas tyre, kap vlerën e miliona lekëve.

“Një milion lekë të reja kam në 2018. Jemi 3 familje në 4 dhoma. Më ka hyrë 1 metër ujë rezervuari,” – tregoi Nezir Peshkëpia, banor i zonës.

“Rreth 5 milion e gjysmë, që kemi parë atë listën se ne nuk e dimë të sigurt,” – tha Ramiz Elezi.

Sipas banorëve, bashkia është selektive në dhënien e dëmshpërblimeve.

Ata ngrenë dyshimet, se përzgjedhja bëhet në bazë të bindjeve politike.

Ndonëse të lodhur nga mosreagimi i institucioneve, banorët deklarojnë se do ta vazhdojnë betejën e tyre.

Megjithëse institucioni i Avokatit të Popullit u ka dhënë për këtë rast të drejtë banorëve dhe ndonëse nga verifikimet e kryera nga bashkia pas përmbytjeve në këtë zonë, rezultoi se 130 familje kishin pësuar dëme, fondi për dëmshpërblimin e tyre edhe pas kaq vitesh nuk është lëvruar ende.

LEXONI GJITHASHTU:

• FOTOGALERI| 3 viktima nga përmbytjet në Zelandë të Re
• Moti i keq, si paraqitet situata e përmbytjeve në Shkodër