573 vite nga pushtimi i Stambollit, Erdogan: Mehmeti II ndryshoi historinë

Presidenti i Turqisë, Recep Tayyip Erdogan, përkujtoi 573-vjetorin e pushtimit osman të Stambollit, duke e cilësuar ngjarjen si një moment historik që solli paqe, siguri dhe rilindje për qytetin.

Gjatë fjalës së mbajtur në programin “Nga Pushtimi i Stambollit në Pushtimin e Zemrave”, të organizuar nga dega e Partise AK në Stamboll, Erdogan nderoi luftëtarët osmanë të vitit 1453 dhe vlerësoi figurën e Sulltan Mehmetit II, i njohur si Fatih Sulltan Mehmeti.

“Në këtë ditë domethënëse, përkujtoj me respekt të gjithë ata që morën pjesë në pushtimin e Stambollit dhe u flijuan në muret e qytetit. Gjithashtu kujtoj me nderim komandantin e lavdishëm që pushtoi Stambollin në moshën 21-vjeçare”, deklaroi Erdogan.

Presidenti turk theksoi se pushtimi i Stambollit nuk ishte vetëm një fitore ushtarake apo një ngjarje që ndryshoi epokat, por një transformim historik që solli stabilitet dhe bashkëjetesë për popujt dhe besimet e ndryshme në qytet.

Ai përmendi edhe historianin e njohur Halil Inalcik, duke thënë se Mehmeti II punoi për ta kthyer Kostandinopojën në një qendër madhështore turko-islame përmes investimeve dhe institucioneve publike.
Erdogan rikujtoi gjithashtu episodin historik të transportimit të anijeve osmane përmes tokës drejt Bririt të Artë, duke e cilësuar atë simbol të vendosmërisë dhe besimit në fitore.

“Nëse besojmë, punojmë dhe qëndrojmë të vendosur përballë sfidave, nuk ka qëllim që nuk mund ta arrijmë”, u shpreh Erdogan.