Ilir Meta paralajmëron rikthimin në LSI: Më 24 korrik 2022 do marr kartën e anëtarësisë

Zëdhënësi i Presidentit Ilir Meta, Tedi Blushi ka njoftuar se kreu i shtetit në 24 korrik të vitit 2022 do të rikthehet në LSI, duke marrë kartën e anëtarësisë së kësaj partie.

Kjo datë përkon edhe përfundimin e mandatit të Ilir Metës si president.

“Presidenti Meta në respekt të sakrificave për demokracinë, që ka bërë LSI, i njofton të gjithë anëtarët dhe simpatizantët e saj se më 24 korrik 2022 do të rikthehet për të marrë kartën e anëtarësisë së LSI dhe do t’u bashkohet përpjekjeve të të rinjve dhe të rejave për Shqipërinë e Shqiptarëve”, thuhet në reagimin e Tedi Blushit.

Ndërkohë në reagim theksohet se presidenti falënderon Kryemadhi për reflektimin e saj lidhur me lënien e mandateve dhe bojkotin e zgjedhjeve vendore.

Sipas kreut të shtetit, këto veprime mbifuqizuan pushtetin e Kryeministrit dhe i lehtësuan bërjen e shumë ligjeve korruptive me porosi dhe në interes vetëm të oligarkëve dhe blerjes së zgjedhjeve.

“Presidenti Meta vlerëson fushatën e ndershme dhe model të LSI dhe sidomos rreth 110 mijë qytetarët, të cilët i rezistuan presionit të mafies, bandave, diskriminimit mediatik, survejimit dhe presioneve policore” thuhet më tej në reagimin e Tedi Blushit në Facebook.

Lexoni gjithashtu:

Humbja e zgjedhjeve, Kryemadhi: Gabuam në djegien e mandateve dhe me bojkotin e zgjedhjeve lokale