Një djalë gjashtë vjeçar, i cili ishte zhdukur prej pesë ditësh, është gjetur thellë në një pyll në Vietnam.
Dang Tien Lam, i cili jeton në provincën veriperëndimore Yen Bai, ishte duke luajtur në një lumë me nëntë vëllezërit e motrat e tij më 17 gusht, kur ai endej nëpër kodra dhe humbi, thanë raportet lokale, shkruan BBC.
Ai u gjet të mërkurën nga fermerët vendas të cilët dëgjuan klithmën e një fëmije ndërsa po pastronin një fushë kanelle afër pyllit.
Lam, i cili u gjet i ulur në shkurret e kasavës rreth 6 km nga vendi ku u zhduk, ishte dobësuar aq shumë sa nuk ishte në gjendje të qëndronte në këmbë.
“Jam shumë i lodhur, nuk mund të ngrihem, të lutem më mbaj lart”, tha Lam, sipas fermerit 52-vjeçar Ly Van Nang.
Lam mbijetoi me gjethe, fruta të egra dhe ujë të përrenjve, thanë raportet.
Fotot në internet tregojnë vendasit që kujdesen për të dhe i ofrojnë tortë pasi e nxorën nga pylli.
Ai u gjet i veshur me një bluzë të kuqe dhe pantallona të shkurtra që ishin krejtësisht të ndotura.
“[Fëmija më tha] se kur humbi, nuk mund të gjente rrugën për në shtëpi”, tha zoti Nang, sipas faqes lokale të lajmeve Dan Tri.
Dhe sa më shumë ecte, aq më shumë nuk gjente rrugëdalje”.
Policia tha se ishte një “mrekulli” që Lam u gjet i gjallë.
“Urime që u kthyet shëndoshë e mirë pranë familjes”, kanë shkruar oficerët në një postim në Facebook.
Lajmi nxiti lehtësim në mediat sociale, me shumë njerëz që uruan familjen e Lam dhe falënderuan ekipin e kërkimit për përpjekjet e tyre.
Autoritetet lokale kishin mobilizuar më shumë se 150 persona – duke përfshirë oficerë policie, ushtarë dhe vullnetarë vendas – në kërkim të djalit të ri.
LEXONI GJITHASHTU:
- Burri hap derën e avionit, arrestohet pasagjeri në Australi
- Fundoset jahti në Siçili, gjendet një trup i pajetë, 6 të tjerë të zhdukur
