78 vjet nga “Hiroshima”, Guterres: Hija bërthamore është shfaqur edhe një herë

Në Hiroshima u shënua sot 78-vjetori i bombardimeve bërthamore amerikane. Në orën 08:15 të mëngjesit u mbajt një minutë heshtje, pikërisht në momentin kur bombarduesi amerikan “Enola Gay” hodhi bombën atomike dhe e shpërtheu mbi qytet më 6 gusht 1945, duke vrarë rreth 140 mijë njerëz.

Në Deklaratën vjetore të Paqes, e cila u lexua në një ceremoni në Parkun Përkujtimor të Paqes, kryebashkiaku i Hiroshimës Kazumi Matsui përshëndeti vizitën historike të liderëve të G-7 në Parkun dhe Muzeun Përkujtimor të Bombës Atomike si provë se “shpirti” i Hiroshimës kishte arritur tek ata.

Mesazhi i Sekretarit të Përgjithshëm të OKB-së Antonio Guterres u lexua në ceremoninë përkujtimore në Hiroshima nga Izumi Nakamitsu, nënsekretar i përgjithshëm i OKB-së dhe Përfaqësues i Lartë për Çështjet e Çarmatimit.

Në mesazhin e tij, Guterres paralajmëron se hija bërthamore është shfaqur sërish mbi botën si gjatë Luftës së Ftohtë, por përballë këtyre kërcënimeve, komuniteti global duhet të veprojë si një, sepse çdo përdorim i armëve bërthamore është i papranueshëm.

“E vetmja mënyrë për të eliminuar rrezikun bërthamor është eliminimi i armëve bërthamore, të cilat mbeten prioriteti më i lartë i Kombeve të Bashkuara për çarmatimin. Jo më (tragjedi si) Hiroshima dhe Nagasaki. Çarmatimi nuk është një ëndërr utopike, por e vetmja rrugë për një botë më të sigurt për të gjithë”, thuhet në mesazhin e Guterres.

LEXONI GJITHASHTU:

• 76 vjet nga bombardimet bërthamore në Hiroshima dhe Nagasaki
• Putin do të përdorë armë bërthamore? Biden: Kërcënimi është real