80% e shqiptarëve nuk besojnë tek patronazhistët, tregon sondazhi i “Barometri”

Shqiptarët nuk kanë besim tek patronazhistët që u kthyen në një temë kryesore të debatit politik gjatë fushatës së zgjedhjeve të fundit parlamentare të mbajtura më 25 prill.

Euronews Albania dhe MRB i pyeti shqiptarët se sa besim kanë tek institucionet apo grupimet e ndryshme në vend. Nivelin më të ulët të besueshmërisë shqiptarët e kanë për patronazhistët.

Kjo mungesë besimi gjendet edhe tek vetë votuesit e Partisë Socialiste (74.5%) përpos atyre të Partisë Demokratike (81.8%).

Diskutimi për patronazhistët lindi pas publikimit të një databaze të dhënash për mbi 910 mijë votues në Qarkun e Tiranës.

Patronazhistët jepnin informacion mbi prirjen e votës por edhe detaje dhe të dhëna konfidenciale dhe personale të tjera për qytetarët duke thyer privatësinë.

Disa qindra qytetarë të Qarkut të Tiranës, të përfaqësuar nga organizata rinore “GUXO” por edhe PD, paditën PS në SPAK për çështjen e zotërimit të paligjshëm të të dhënave personale për qëllime politike gjatë fushatës zgjedhore.

SPAK është shprehur se publikimi i këtyre të dhënave nuk përbën veprën penale “korrupsion aktiv të zgjedhje” por po heton për veprën penale “Hyrja e paautorizuar kompjuterike”.