Qendra Kombëtare e Librit ka mbajtur një aktivitet për 99-vjetorin e Martin Camajt, poeti e shkrimtari i njohur që u arratis nga Shqipëria gjatë komunizmit.

Botuesi Bujar Hudhri, i cili ishte i pranishëm në aktivitet, tha se Camaj krijoi e jetoi në vetmi, duke bërë një letërsi që do të takohej më vonë me lexuesin.

“Camaj ka pasur një vetmi të dyfoshtë, e para çdo shkrimtar është I vetmuar kur shkruan dhe pasi shkruan ai dialogon me lexuesin dhe kjo vetmi tretet. Camaj nuk ka pasur mundësi që të kishte lexues përballë”-tha botuesi.

Gjuhëtarja Ledi Shamku, tha se një tjetër përmasë e Camajt që mbeti në kontakt me shqiptarë të tjerë të mërguar e arratisur ishte ajo e gjuhëtarit.

“Camaj ka një produktivitet gjuhësor të pabesueshëm për nga sasia dhe ende të parrokshëm për nga cilësia. Është gjuhëtar historik.” –u shpreh gjuhëtarja.

I arratisur nga Shqipëria për në Jugosllavi, ai do të shpërngulej në Itali dhe Gjermani, që u bë qendra e tij e krijimit dhe punës.

Vepra e tij e plotë është botuar nga Onufri duke përfshirë, Djellën, Dranjën, Karpën, Kandilin e Argjandtë, Palimpsestin, Rrathët.

Emri i tij ndiqet sërishmi nga dyzimi, në një anë mosnjohja e në tjetrën mohimi, i njëjti mohim që shoqëron këdo, që qe përjashtuar në shqipërinë e mbyllur.