Shmanget sulmi terrorist në një sinagogë në Gjermani, arrestohen 4 persona

Policia gjermane parandaloi një sulm terrorist të karakterit islamik, që kishte si shënjestër një objekt kulti në qytetin e Hagenit.

Forcat e sigurisë arrestuan 4 persona të dyshuar si përgatitës të sulmit, mes të cilëve një 16-vjeçar nga Siria.

Herbert Reul, ministri i Brendshëm në Rehnin Verior, në Vestfalia, tha se sulmi ishte i paralajmëruar dhe për këtë arsye u arrit të shmanget.

“Ne morëm informacione konkrete se mund të kishte një sulm ndaj një sinagoge gjatë festivalit hebre. Informacioni na çoi në përfundimin se bëhej fjalë për një kërcënim me sfond islamik. Ne arritëm të identifikonim në kohë shënjestrën dhe personat e dyshuar si përgatitës të krimit”, tha Herbert Reul.

Forcat e policisë morën në mbrojtje sinagogën e Hagenit, një qytet me rreth 200 mijë banorë, në perëndim të vendit.

Kërcënimi përputhej me zhvillimin e festivalit Yom Kippur, vigjilja e të cilit festohet nga hebrenjtë nëpër sinagoga.

Në vitin 2019, një ekstremist i djathtë kreu një sulm të armatosur ndaj një objekti të tillë kulti në qytetin Halle, duke lënë të vdekur 2 persona.

Asokohe, policia u përball me kritika se ishte treguar e ngadaltë në reagimin e saj, edhe pse arriti të arrestonte autorin, i cili po vuan dënimin me burgim të përjetshëm.

LEXONI GJITHASHTU:

• FBI publikon dokumentin për 11 shtatorin, detaje për lidhjet e terroristëve me shtetas sauditë në SHBA