Vdekja e 28-vjeçarit në Tiranë, hoteli: Nuk dimë çfarë e shkaktoi

Ajdin Mustafa prej 2 ditësh qëndronte në hotel “Rogner”, aty ku fatkeqësisht humbi jetën aksidentalisht.

Shkëputja e kangjellave të ballkonit, ku ishte mbështetur, u bë shkak për rënien nga kati i pestë i 28-vjeçari nga Maqedonia e Veriut, i cili nuk mundi ti mbijetonte plagëve të marra.

Për ngjarjen e rëndë policia e Tiranës procedoi në gjendje të lirë administratorin e hotelit ‘Rogner’ dhe përgjegjësin e mirëmbajtjes për shkelje të rregullave të mbrojtjes në punë.

Burime nga Prokuroria e Tiranës bëjnë me dije se hetuesit janë të bindur se shkak për ngjarjen aksidentale të të riut është bërë amortizimi i kangjellave.

Euronews Albania iu drejtua zyrtarisht përfaqësuesve të hotel “Rogner”. Në përgjigjen e dhënë ata thonë se nuk e kanë të qartë shkakun që solli vdekjen e 28-vjeçarit.

Por kush i kontrollon në mënyrë të vazhdueshme shërbimet hoteliere për kushtet e sigurisë?

Sipas ligjit kolauduesit e licencuar janë personat që japin miratimin për sigurinë e ndërtesës pas përfundimit, por këto kontrolle nuk kryhen në mënyrë të vazhdueshme.

Siguria deri tani i është lënë ndërgjegjes së administratorëve të këtij shërbimi për të plotësuar ose jo parametrat e sigurisë për klientët e tyre.