Sopranoja Ermonela Jaho: Në momentin që nuk do kem emocione, do ta lë këtë zanat

“Në momentin që nuk do kem emocione unë do ta lë këtë zanat”. Kështu u shpreh për Euronews Albania, sopranoja e njohur Ermonela Jaho teksa tregoi detaje nga karriera e saj dhe shfaqjet e rëndësishme.

“Emocioni është emocion. Në momentin që nuk do kem emocione unë do ta lë këtë zanat. Gjithmonë është ajo frika, ajo pasiguria, sa herë shkel në një teatër të ri përgjegjësia është shumë e madhe”, u shpreh sopranoja.

Ajo tregoi se një nga eventet më të rëndësishme që e pret është shfaqja e “Madame Butterfly” në Spanjë në fillim të tetorit ku salla do të jetë e mbushur plot me artdashës.

“Kjo është një opera që e kam kënduar mbi 170 herë deri më sot. Por gjithmonë është hera e parë se çdo ditë ne jemi ndryshe, është një ditë e re. Ke një përgjegjësi të madhe sepse publiku ka pritshmëri dhe dje mora një lajm të ri, që pas karantinës, ‘Madame Butterfly’ do të jetë shfaqja e parë me publikun 100%”, tha sopranoja e njohur.

LEXONI GJITHASHTU:

• ‘S’mund të jetojmë dot pa artin’, Ermonela Jaho tregon emocionet në Teatrin e Operas dhe Baletit