“Kufizimi” përplas Ramën e Metën| Kryeministri: Burg për shkelësit. Presidenti bën thirrje të respektohet Kushtetuta

Në prag të ndalim-qarkullimit prej 40 orësh, duke nisur nga ora 13:00 e së shtunës e deri në orën 5 të mëngjesit të së hënës, shumë qytetarë u dyndën në dyqane dhe tregje për të bërë blerjet e fundit.

Për të mos u përsëritur të tilla skena, kryeministri Edi Rama paralajmëroi se ushtria dhe policia do të krijojnë urgjentisht kordonë dhe do të penalizohet kushdo që do të shkelë rregullat për parandalimin e coronavirus.

“Masat e reja ndëshkimore do të jenë ligj ditën e hënë dhe për kokëshkretët do të shkohet deri në heqje lirie!” u shpreh kreu i qeverisë.

Duke renditur qytetet, që tashmë jane vatra që po zgjerohen dita-ditës, kryeministri tha se nuk ka rrugë tjetër veç zbatimit të rregullave strikte, për ta fituar luftën me COVID-19

“Tirana është vatra më e rrezikshme e luftës. Durrësi njësoj si Tirana mund të kthehet në Vaterlonë tonë. Shkodra është tanimë një bombë me sahat. Fieri është një rrezik i madh potencial. Kudo mund të na iki avantazhi që kemi krijuar, në qoftë se do ta bëjmë si Kombëtarja Kuqezi që pjesën e parë duket sikur do fitojë, pastaj…“ u shpreh kreu i qeverisë.

Për mosrespektim të masave reagoi edhe presidenti Ilir Meta. Por numri një i shtetit kërkoi që masat të merren duke respektuar normat në fuqi, në mënyrë që të mos krijohen konflikte sociale apo gjyqësore.

“Është me rëndësi që çdo akt i Këshillit të Ministrave që miratohet në këtë situatë, t’i nënshtrohet paraprakisht një vlerësimi sa më të thelluar, në proporcion me gjendjen që dikton domosdoshmërisht miratimin e tyre. Masat kufizuese duhet të jenë në përputhje me Kushtetutën e Republikës së Shqipërisë dhe të ligjeve në fuqi, por edhe t’i përgjigjen vetëm nevojës dhe urgjencës”, tha kreu i shtetit.

Në 24 orët e fundit janë gjobitur 223 persona dhe 33 drejtues mjetesh për moszbatim të urdhrit të ndalim-qarkullimit