Pasojat e COVID-19 në vend, fermerët e qarkut të Korçës nuk mund të shesin prodhimet e tyre

Një ndër sektorët më të prekur nga izolimi për shkak të COVID-19 në vendin tonë është edhe bujqësia. Shumë fermerë në qarkun e Korçës shprehen se i gjithë prodhimi bujqësor u ka mbetur pa shitur për shkak të rënies së fuqisë blerëse në vend dhe rajon.

“Këtu sot për sot janë mbi 10 mijë kuintalë patate pa shitur në të gjithë fshatin. S’ka treg, makinat vijnë rrallë, edhe ata që vijnë i duan pa lekë. Se si do bëhet puna jonë. Kemi punuar tërë vitin, shteti nuk mban asnjë lloj përgjegjësie”, tha fermeri Skënder Llapjani.

Fermerët as nuk mendojnë fitimin, por kërkojnë mbulim të shpenzimeve nga institucionet shtetërore. E njëjtë është situata edhe për Ilirian Agollin.

“Tani po presim të shesim, por nuk na vjen asnjë tregtar. Nuk e dimë ne se nga hyn malli dhe nga nuk hyn. Nuk po marrim dot çerekun e lekëve, sepse për fitim nuk bëhet fjalë”, tha ai.

I revoltuar një ndër fermerët, i cili është kthyer nga emigracioni tregon se është në gjendjen e falimentimit ndërkohë që është gati që të çojë për bamirësisë produktet e tij.

 “Dua të nxjerr  shpenzimet e mia. Unë sot jap dhjetë kuintalë për popullin pa lekë nga ana ime”, u shpreh Igli Kreka.

Ndërkohë sipas ministrit të Bujqësisë, Bledi Çuçi, ky sektor në tërësi nuk është prekur nga COVID 19, ndonëse sipas tij ka çekuilibrim të tregut për disa produkte të caktuara.