Kundërshtoi me dhunë efektivët në Tiranë, polici plagos rivalin e Aldo Bares

Një ngjarje e rëndë ka ndodhur mesditën e sotme në Tiranë. Mësohet se një efektiv policie ka plagosur një shtetas, i cili ishte i armatosur dhe nuk i është bindur urdhrit të efektivëve.

Nga të dhënat paraprake, gazetari i Euronews Albania Eni Ferhati raporton se personi, që mbeti i plagosur në zonën e njohur si “Xhamlliku” në Tiranë është shtetasi Orges Bilbili, person ky me një rrezikshmëri të lartë shoqërore dhe i kërkuar nga policia për disa vrasje të kryera në qytetin e Lushnjës. Fillimisht një patrullë e efektivëve “Shqiponja” ka ndjekur qytetarin që mbeti i plagosur duke i kërkuar autorizimin për daljen në rrugë, por kjo kërkesë ka hasur në refuzimin e të shumëkërkuarit për vrasje.

Pas ndalimit, Orges Bilbili ka bërë disa lëvizje të çuditshme duke futur dorën në një çantë, brenda së cilës kishte një armë. Pasi ka nxjerrë armën nga çanta, agresori nuk i është bindur policisë dhe ka shtënë në ajër, ndërsa efektivi i policisë ka reaguar direkt duke e plagosur në këmbë.

Nga të shtënat me armë ka mbetur i plagosur një tjetër qytetar. Dy të plagosurit janë dërguar me urgjencë në Spitalin e Traumës, ku dhe mësohet se gjendja e tyre shëndetësore është e qëndrueshme dhe jashtë rrezikur për jetën. Kreu i Policisë së Tiranës, Rebani Jaupi ka shkuar menjëherë në vendin e ngjarjes. Ai ka folur edhe për mediat, ndërsa ka thënë se efektivi i patrullës “Shqiponja” ka vepruar sipas rregullores.

Orges Bilbili njihet edhe si rival i bandës së Aldo Bares. Ai ka qenë i shpallur në kërkim nga policia si një nga autorët e dyshuar për ngjarjen e 2016 që njihet ndryshe si “Masakra e Lushnjës”, ku mbetën të vrarë dy qytetarë në mes të Lushnjës. Gjithashtu, ka dyshime të forta se shtetasi Orges Bilbili është i përfshirë në vrasje të tjera në Lushnjë. Ai përshkruhet në skedarët e policisë si person shumë i rrezikshëm, ndërsa FNSH-ja ka dështuar disa herë për ta arrestuar.