Boiken Abazi jep dorëheqjen nga drejtimi i LVV në Shqipëri

Boiken Abazi ka dhënë dorëheqjen nga drejtimi i Lëvizjes Vetëvendosje në Shqipëri.

Përmes një postimi në faqen e vet në Facebook, Abazi shkruan se në datën 15 shtator ka paraqitur dorëheqjen e parevokueshme nga pozicioni i drejtorit ekzekutiv i Qendrës së Lëvizjes në Shqipëri për të mbajtur përgjegjësitë e tij për rezultatet në Shqipëri.

Abazi i vlerëson zgjedhjet e fundit në Kosovë si një fitore të Vetëvendosjes, parti që sipas tij tashmë është e para edhe me votën popullore nëpër komuna në nivel Kosove.

“Kam pritur ta bëj këtë gjë publike, për shkak të situatës në veri të Kosovës dhe raundit të parë të zgjedhjeve lokale. Për hapat e radhës në Shqipëri jemi duke i vazhduar diskutimet.

Ndërkohë në Kosovë, nga vendi i tretë në zgjedhjet lokale të vitit 2017, VETËVENDOSJE! tash është e para edhe me votën popullore nëpër komuna në nivel Kosove. Sfidat nuk janë të vogla para 12 balotazheve pas katër javësh, por jemi me shpresë e të angazhuar si rrallë herë më parë. E ardhmja është e Lëvizjes, e shqiptarëve.

Në zgjedhjet e 25 prillit në Shqipëri, Boiken Abazi garoi si kandidat i pavarur në Tiranë, nën siglën e Vetëvendosjes, por nuk mundi të merrte mandatin e deputetit.