Persona në kërkim dyshohet se u përfshinë në ekzekutimin mafioz në Peqin

Vrasja e ish-anëtarit të bandës së Lushnjës, Alban Semaku në afërsi të lumit Shkumbin në Peqin, ka rikthyer dhe njëherë në vëmendje konfliktet e vjetra në këtë qytet.

Burime nga grupi hetimor bëjnë me dije se ai është larguar nga banesa një ditë para vrasjes, ku më pas dyshohet se është takuar me personat që e ekzekutuan. Hetuesit dyshojnë se për të shkuar deri në vendin që u vra, autorët kanë përshkruar rrugën e njohur si Bishti i Zhurit.

Ndonëse deri tani nuk ka ende asnjë gjurmë nga autorët, grupi hetimor dyshon se shkak i eliminimit të 38-vjeçarit janë bërë përplasjet e vjetra në qytetin e Lushnjës. Nuk përjashtohet mundësia që në vrasje të jenë të përfshirë dhe persona në kërkim nga drejtësisë në këtë qytet.

Implikimi i kësaj kategorie personash në atentate të llojit mafioz, vitet e fundit është kthyer në një shqetësim konkret për autoritetet. Eksponentë të njohur të botës së krimit të cilët prej kohësh janë në kërkim nga drejtësia akuzohen për një sërë ngjarjesh kriminale në vend, që kanë regjistruar jo pak viktima. Për kapjen e këtyre individëve u ngrit dhe struktura speciale ‘Fast’, por mesa duket ende nuk është rënë në gjurmët e tyre.