Bashkia ka shkelur kontratën me operatorët e transportit publik, thotë Qoshja

Kreu i Shoqatës së Transportit Qytetas Rixhin Qoshja tha për Euronews Albania se bashkia nuk i është përmbajtur kontratës që ka me operatorët e transportit publik.

Gazetarët e “Mirëmëngjes” sollën në vëmendje se bashkia dhe operatorët kanë një kontratë ku përcaktohet numri i autobusëve, intervalet se kur kalojnë në stacione, etj. Qoshja sqaroi se kjo kontratë nuk është shkelur vetëm nga operatorët.

Pika ku përshkruhet se bashkia duhet të ndërtojë infrastrukturën e nevojshme ku do të kalojnë urbanët, është shkelur nga Bashkia Tiranë, sipas tij.

“Minimumi është të krijosh rrugën dhe t’i kërkosh operatorit që të arrijë në orar, po kur nuk ka infrastrukturë ska si të vijë në orar. Ne gjobitemi për këtë,” – u shpreh Kreu i Shoqatës së Transportit Qytetas.

Sipas tij është detyra e politikës që të eleminojë problemet e opertorëve të cilët janë në shërbim të njerëzve. Heqja e licencave nuk është zgjidhje për aq kohë sa do vijë një tjetër operator privat që do ketë po të njëjtat probleme.

Sa i takon përgjegjësisë morale ndaj njerëzve që nuk u lajmëruan për përgjysmimin e mjeteve që operojnë në transportin publik, Qoshja deklaroi se ata si shoqatë kanë dërguar shkresën te autoritetet përkatëse dhe është detyrë e tyre të njoftojnë qytetarët.

LEXONI GJITHASHTU:

• Transport publik në Tiranë, i kufizuar pa afat
• Transporti në krizë pa afat në Tiranë, qytetarët të revoltuar
• Kreu i Shoqatës së Transportit Publik: Jemi në krizë financiare, asnjë përgjigje nga institucionet