Miliona euro për laboratorët, mjeku: Qytetarët paguan kostot e shtetit

Mjeku Erion Dasho tha për Euronews Albania se gjatë periudhës së pandemisë qytetarët kanë paguar kostot e shtetit sa i takon testeve për COVID-19.

Sipas tij duhet të ishin marrë masa për të vendosur çmime referente dhe taksa çmimi fikse për laboratorët privatë në mënyrë që të mos “rripeshin” qytetarët.

Specialisti i Shëndetit Publik komentoi se një test kushtonte 5-6 fish më shumë se kostoja ndërsa një test antigjen ishte dhjetëra fish më i shtrenjtë.

Dasho sqaroi se ligji i sëmundjeve infektive thotë qartë se kostot përballohen nga shteti dhe qytetari përfiton falas shërbimet shëndetësore.

“Në rast se një organ rregullator si Ministria e Shëndetësisë nuk merr masa për ta kontrolluar këtë ‘zhvatje’ të qytetarit shqiptar atëherë pikëpyetja që ka të drejtë të ngrejë çdo kush është: Kush po përfiton nga këto çmime?” – u shpreh mjeku.

Laboratorët privatë që ofruan të parët analizat për COVID-19 rezultuan përfituesit më të mëdhenj financiarë të pandemisë. Kërkesa e shtuar për tamponë, në mungesë të përgjigjes nga shteti, u siguroi atyre fitime deri në 12 herë më të larta se vitet e kaluara.

Sipas Erion Dashos hetimi për këtë çështje duhet të kishte nisur tashmë.

LEXONI GJITHASHTU: 

• Laboratorët privatë kanë 4-fishuar fitimet gjatë pandemisë së COVID-19