Kodheli thotë se duhet pranuar Vettingu për politikanët, Rushaj: Rezerva ndaj SPAK, por procesi është thelbësor

Vettingu i politikanëve i kërkuar nga Partia Demokratike duket se do jetë çështja e parë që do të pajtojë mazhorancën dhe opozitën.

Pas deklaratave të kryeministrit Rama, sinjalin e fortë e dha kryetarja e Komisionit të Jashtëm, Mimi Kodheli, gjatë një intervistë në Euronews Albania.

“Mendoj se duhet pranuar. Jam krejt e hapur dhe dëshirëplotë që ta pranoj këtë gjë që vjen si krejt natyrshëm dhe që duhet absolutisht bërë,” – u shpreh Kodheli.

Ndërsa kreu i grupit parlamentar të PD-së, Alfred Rushaj tha se pavarësisht rezervave që opozita ka për SPAK, ky proces është shumë i rëndësishëm që të bëhet.

“Ne kemi rezerva me punën e SPAK e s’kemi lëvizur nga ai qëndrim por ne po investojmë tek kjo gjë për dy arsye. E para se s’kemi asgjë për të fshehur pavarësisht kush e bën Vettingun e politikanëve, e dyta duke qenë proces publik jo pas dyerve të mbyllura prokurorët e SPAK që do merren me këtë punë do duhet që ta bëjnë vendimmarrjen e tyre publike, standardi i tyre do jetë standard publik,” – u shpreh Rushaj.

Vettingu i politikanëve është hedhur si ide që në vitin 2018. Aso kohe i pari që foli për një gjë të tillë ishte Fatmir Xhafaj në pozitat e ministrit të Brendshëm. Ndërsa pak muaj më pas, Partia Demokratike shkoi me një propozim konkret në Parlament, por që u refuzua nga mazhoranca socialiste.

LEXONI GJITHASHTU: 

• Vettingu i politikanëve, Basha: Fillimisht në sitën e SPAK, kryeministri, deputetët dhe kryetarët e bashkive
• Vjosa Osmani nuk pajtohet me konstatimet e KE për vettingun
• Vettingu i politikanëve, Soreca: Ende nuk e kam lexuar propozimin e PD-së në Kuvend