Cirku zhvendoset në një palestër shkolle, artistët të pakënaqur

Shembja e cirkut i ka lënë artistët në rrugë, pa një vend dinjitoz për të performuar dhe prezantuar shfaqjet e planifikuara të kalendarit artistik.

Ministrja Margariti e prezantoi ambientin e ri të cirkut në palestër së bashku me nënkryetarin e Bashkisë Tiranë, Arbër Mazniku.

“Ne do të vazhdojmë të identifikojmë edhe hapësira të tjera, edhe publike, ku cirku të vazhdojë performancën”, tha ministrja.

Bashkë më nënkryetarin e bashkisë së Tiranës, Arbër Mazniku, Elva Margariti prezantoi si një zgjidhje të shpejtë, pas shembjes së çadrës, palestrën e shkollës Sinan Tafaj.

Artistët që i kanë kushtuar jetën dhe që e njohin fare mirë artin e veçantë të cirkut, e quajtën këtë vizitë një show, sepse sipas tyre, ata nuk kanë as mjetet dhe ambientin e duhur për të bërë stërvitjen, e aq më tepër për të dhuruar shfaqje për publikun.

“Ky është një show i radhës. Duan të mbulojnë gabimet e veta. Në çadër zhvilloheshin numrat e ajrit, të lartësive, që ishin themeli i cirkut. Ndërsa këto skena janë të kufizuara, shfaqjet do të bëhen sa për të kaluar radhën”, tha artisti Agron Muho.

Edhe pse çmontimi i çadrës pritej, Ministria e Kulturës ndodhet e pa përgatitur, pa një plan dhe ende në kërkim të vendeve, për hapësirën e re të çadrës së cirkut.

LEXONI GJITHASHTU:

• KLSH nis hetimet për shembjen e Cirkut Kombëtar