PD depoziton në Kuvend propozimin për uljen e TVSH-së në 6%

Partia Demokratike do të depozitojë në Kuvend propozimin për uljen e TVSH-së nga 20% në 6%.

Vendimi është marrë në mbledhjen e Grupit Parlamentar dhe nisma vjen në një kohë kur në vend ka pasur rritje të çmimeve.

Propozimi i PD për uljen e TVSH-së nga 20% në 6% vlen vetëm për produktet e shportës, mëson Euronews Albania.

Nismën e paralajmëroi kreu i PD, Lulzim Basha dy javë më parë dhe sipas tij opozita do të tregoi me këtë hap se është “gati për të qeverisur vendin”.

“Nuk do t’i dërgojmë thjesht një kërkesë, copë letër, por një kalkulim të plotë se si arrihet kjo”, deklaroi Basha gjatë një deklarate për mediat.

Partia Socialiste gjatë kohës kur ishte në opozitë në vitin 2011, mbështeste fort uljen e TVSH-së për çmimet e shportës, madje duke shkuar dhe në nivel 0% për kategori të veçanta.