Aksioni i Europol: 150 të arrestuar për blerje dhe shitje ilegale në internet

Rreth 150 persona janë arrestuar gjatë një aksioni të përbashkët ndërkombëtar për akuzat e blerjes dhe shitjes ilegale të produkteve në internet.

Europol bën me dije se ky është një nga aksionet më të mëdha që synoi të godiste rrjetin e errët online.

Operacioni i quajtur ‘Dark HunTOR’, përfshiu një sërë veprimesh që u kryen veçmas, por pati bashkëpunim edhe në Australi, Bullgari, Francë, Gjermani, Itali, Holandë, Zvicër, Mbretërinë e Bashkuar dhe Shtetet e Bashkuara.

Në Shtetet e Bashkuara, policia arrestoi 65 persona, 47 në Gjermani, 24 në Britani të Madhe, 4 në Itali dhe Holandë.

Agjentët konfiskuan gjithashtu 26.7 milionë euro kesh, monedha virtuale, si dhe 45 armë, 234 kilogramë drogë, duke përfshirë 25.000 pilula ekstazi.