BE gjobit Poloninë, Varshava do paguajë 1 milion euro në ditë për shkelje të ligjit

Polonia është urdhëruar të paguajë një gjobë prej 1 milion euro në ditë për shkak të ligjit të kontestuar të saj që ndryshon sistemin e drejtësisë.

Gjykata Evropiane e Drejtësisë, që vendosi gjobën, deklaron se masat do të jenë në fuqi derisa Varshava t’i bindet vendimit të saj të marrë në korrik, që kërkon pezullim të menjëhershëm të Dhomës Disiplinore të Gjykatës Supreme polake.

Aksioni ligjor u ndërmor nga Komisioni Evropian, që thotë se dhoma kërcënon pavarësinë e gjykatave dhe rrjedhimisht aplikimin e ligjit të BE-së.

“Nuk është një reagim i fortë, por një procedurë normale që tregon se nëse vendimi i Gjykatës Evropiane të Drejtësisë injorohet, atëherë vendoset një gjobë. Dialogu me qeverinë polake zgjat prej 6 vjetësh dhe kjo ka çuar në një situatë ku vendimet e gjykatës janë injoruar dhe ashtuquajtura Gjykatë Kushtetuese në Poloni, që është një lodër e qeverisë, del hapur kundër ligjit të BE-së. Ndaj, fakti që Gjykata Evropiane po mbron sundimin e ligjit është një shenjë e mirë dhe do të ishte akoma më mirë nëse qeveri të tjera do t’i bashkoheshin betejës së Komisionit për demokracinë dhe sundimin e ligjit”, thotë Daniel Freund, euro-deputet i të Gjelbërve, Gjermani.

Shumë gjyqtarë polakë e shohin Dhomën Disiplinore si një vegël për t’u bërë atyre presion në favor të qeverisë polake.

Kryeministri polak, Mateusz Morawiecki deklaroi javën e kaluar në Parlamentin Evropian se dhoma në fjalë do të shfuqizohet, por nuk dha një afat kohor.

Ndërkohë, një zëdhënës qeveritar reagoi duke thënë se, zbatimi i ndëshkimeve dhe shantazheve ndaj Polonisë nuk është rruga e duhur.

Gjobat mund të mbahen nga fondet që Polonia merr nga Brukseli.