Dhuna në familje, qëndrimi në karantinë shton rastet e agresionit në Evropë

Teksa coronavirusi përhapet në rrugët e shkreta, brenda në shtëpitë e njerëzve ka një kërcënim të madh. Miliona njerëzve u është thënë të qëndrojnë në shtëpitë e tyre, por disa e gjejnë veten në izolim social me një partner abuziv.

Autoritetet thonë se të dhënat e pakta që kanë deri më tani shfaqin një tablo shqetësuese për mijëra njerë që ndodhen në rrezik.  

“Dhuna në familje ka të bëjë me pushtetin dhe kontrollin. Me dikë që përpiqet të kufizojë atë që jeni, si jeni dhe ç’mund të bëni. Dhe kjo situatë rrit të gjitha prirjet për dhunë”, shpjegon Suzanne Jacob, nga shoqata “Save Lives”. 

Italia dhe Spanja, dy vende të prekura ndjeshëm nga epidemia, kanë raportuar vdekje nga dhuna në familje gjatë javëve kur qëndrimi në shtëpi ka qenë i detyrueshëm.

27-vjeçarja Lorena Kuaranta ndodhej pak javë larg diplomimit në mjekësi. Në fillim të prillit, partneri i saj i tha policisë se e kishte vrarë teksa ndodheshin të mbyllur në shtëpi.

Në Francë, raportimet për dhunë në familje u rritën me mbi 30 për qind gjatë ditëve të para të karantinës, me shumicën e rasteve të verifikuara në Paris.

“Shumë qeveri janë vënë në lëvizje për t’iu përgjigjur këtij kërcënimi. Në disa vende evropiane, përfshirë Francën, farmacitë janë kthyer në pikë takimi. Viktimat mund të përdorin kodin e punës për të kërkuar ndihmë. Dhe për ata që nuk lëvizin, një shërbim sms u lejon viktimave të kërkojnë ndihmë në heshtje”, tregon Ryan Thompson.

Thirrjet për të mbështetur linjat telefonike janë të shumta në Evropë dhe viktimat po përfitojnë nga burimet që kanë në dispozicion. Por grupet e avokatisë thonë se mund të bëhet më shumë.

“E vlerësoj faktin që qeveria franceze po përpiqet të gjejë zgjidhje. Por aktualisht ajo që na duhet është të punësojmë staf që di të merret me rastet e dhunës në familje e që mund të ndihmojnë policinë. Këto ditë policia është në vijën e parë, pasi ajo është lajmëruar për çdo rast. Por kjo nuk mjafton dhe ata nuk janë të përgatitur për këtë lloj dhune”, thotë Caroline de Haas, nga organizata Nous Toutes. 

De Haas thotë se do të donte të kishte më shumë mbrojtje, duke vënë në dukje vende si Danimarka ku autoritetet garantojnë dhoma hoteli për viktimat, me shpresë së mund të gjejnë pakëz ngushëllim brenda.