PS ka miratuar dakordësinë për ngritjen e Komisionit për Reformën Zgjedhore

Partia Socialiste ka miratuar dakordësinë e plotë për të ngritur Komisionin e Posaçëm të Reformës Zgjedhore, të propozuar nga Partia Demokratike.

Kreu i grupit parlamentar të Partisë Socialiste Taulant Balla bëri të ditur se Damian Gjiknuri do të propozohet si bashkëkryetar i këtij komisioni.

“Ne kemi miratuar dakordësinë tonë të plotë sot për të ngritur këtë komision, ku do të propozojmë zotin Gjiknuri si bashkëkryetar. Shpresojmë që këtë të bëjë edhe Partia Demokratike”, tha Balla.

Duke folur për mediat pas mbledhjes së kryesisë të Partisë Socialiste, Taulant Balla tha se tani presin nga PD-ja që të propozojë bashkëkryetarin, në mënyrë që projektvendimi të kalojë në Kuvend.

“Të dy bashkëkryetarët do të formojnë dhe formulojnë projektvendimin. Kemi shumë formula ekzistuese të mënyrës së organizmit të reformës zgjedhore. Ato janë drejtuar me bashkëkryetar, ose me ndërhyrjen e palëve. Në këtë këndvështrim, sapo projektvendimi të jetë gati, sapo PD të propozojë bashkëkryetarin e tyre, ne të kalojmë në Kuvend ngritjen e komisionit të posaçëm”, u shpreh Balla.

Partia Demokratike ka depozituar javën që shkoi në Kuvend kërkesën për ngritjen e Komisionit të Posaçëm për Reformën Zgjedhore.

Në kërkesën e firmosur nga 10 deputetë thuhet se Komisioni ka për detyrë hartimin e ndryshimeve kushtetuese dhe të kuadrit ligjor zgjedhor për trajtimin e rekomandimeve të raporteve të OSBE/ODIHR-it për zgjedhjet e 25 prillit dhe zgjedhjeve të mëparshme të pa trajtuara.

Gjithashtu, në kërkesë thuhet se Partia Demokratike ka konstatuar 5 shkelje të rënda që minuan procesin demokratik të zgjedhjeve parlamentare të 25 Prillit që kishin të bënin me shitblerjen e vote, përdorimin e paligjshëm të të dhënave personale si dhe ndryshime të njëanshëm në kushtetutë dhe kodin zgjedhor që sollën heqjen e koalicioneve.

Kryeministri Edi Rama ka pranuar kërkesën e Partisë Demokratike për ngritjen e këtij komisioni.